ဗန်းမော်မိဘမဲ့ဂေဟာကျောင်း ကျောင်းသားနဲ့ဝန်ထမ်း(၄၇ )ဦး ကိုဗစ်ရောဂါပိုးတွေ့

ဗန်းမော်မိဘမဲ့ဂေဟာကျောင်း ကျောင်းသားနဲ့ဝန်ထမ်း(၄၇ )ဦး ကိုဗစ်ရောဂါပိုးတွေ့

 

ကချင်ပြည်နယ် ဗန်းမော်မြို့နယ်အတွင်း ရောဘတ်နှစ်ခြင်းခရစ်ယာန် မိဘမဲ့ဂေဟာ ကျောင်းမှာ ကျောင်းသားအများစုနဲ့ ဝန်ထမ်း တချို့ ကို ကိုဗစ်ရောဂါပိုးစစ်ဆေးတွေ့ရှိပြီး ရောဂါပိုးတွေ့ရှိသူတွေကိုသီးသန့်ခွဲထားတယ်လို့ ဘာသာရေးခေါင်းဆောင် တွေက ပြောပါတယ်။ ဒီမိဘမဲ့ဂေဟာ ကျောင်းဟာ ရောဘတ်စစ်ရှောင်စခန်းထဲရှိနေတာကြောင့် စစ်ရှောင်တွေရောဂါကူးစက်မှာလဲ စိုးရိမ် နေကြပါတယ်။ ဒီအကြောင်း ဗွီအိုအေသတင်းထောက်နိုင်ကွန်းအိန်ကနေသတင်းပေးပို့ထားပါတယ်။

ဗန်းမော်မြို့ ပင်စင်ကုန်းရပ်ကွက် ရောဘတ်နှစ်ခြင်းခရစ်ယာန်မိဘမဲ့ဂေဟာကျောင်းမှာ ကျောင်းသားအများစုနဲ့ဝန်ထမ်းတချို့ ကိုဗစ်-၁၉ ရောဂါကူးစက်ခံထားရကြောင်း စစ်ဆေးတွေ့ရှီတယ်လို့ ဗန်းမော်ခရိုင်ဇုံနယ် နှစ်ခြင်းခရစ်ယာန် လူမှုဖွံဖြိုးရေးဌာန တာဝန်ခံ ဦးထိန်မန်နော်ကပြောပါတယ်။

“ လွန်ခဲ့တဲ့အပါတ်မှာပေါ့ ဘော်ဒါအုပ်နဲ့ ကလေးနှစ်ယောက်သုံးယောက်ဖျားတာပေါ့။ ဖျားဆေးခန်းသွားပြ ပြတော့ ဘယ်က စက်နဲ့စစ်လဲမသိဘူး။ အဲတာPositive ပြတာပေါ့။ ပြပြီး အဲဒီနောက်ရက်မှာဘဲ အဲဒီ Positive ပြတဲ့ကလေးကပြန်ဆုံးသွားတယ်။ ကိုဗစ်နဲ့ဆုံးတာလား ရိုးရိုးတုတ်ကွေးဆုံးတာလား။ (၈)တန်းကျောင်းသားပေါ့ (၁၄)နှစ် (၁၅)နှစ်ပေါ့။ အခုအဲဒီနောက်ပိုင်း သူတို့ အချင်းချင်းဆက်သွယ်ပြီးမှ Positiveရှိတဲ့သူက စုစုပေါင်း(၄၇)ယောက်ဗျ။ Positiveတွေ့တာ မိန်းကလေး(၁၇)ယောက် ယောကျာင်္း လေး(၂၈)ယောက် ဝန်ထမ်းက(၂)ယောက်ပေါ့။ ”

ရောဂါပိုးတွေ့ရှိလူနာတွေကို သီးသန့်ခွဲထားပြီးကုသနေတယ်လို့ပြောပါတယ်။

“ ရောဂါစစ်ကြည့်လိုက်တော့ Positiveပြတဲ့သူကို ကျွန်တော်တို့သတ်သတ်ခွဲခဲ့ပြီးမှ သူတို့ကို အအိပ်အစားပုံမှန်ဖြစ်အောင် စီစဉ်ထားတာပေါ့ဗျာ။ တကယ်လို့အဖျားကြီးလာရင်ကျွန်တော်တို့ သက်ဆိုင်ရာဆေးရုံတွေကို ကျွန်တော်တို့ ပို့ဖို့တော့စီစဉ် ထားပါတယ်။ ”

ဇူလိုင်လကုန်မှာ ရောဘတ်နှစ်ခြင်းခရစ်ယာန်မိဘမဲ့ဂေဟာကျောင်းမှာ ကိုဗစ်ရောဂါသံသယရှိလူနာတဦးသေဆုံးခဲ့ပြီး ကျောင်းကို စစ်ဆေးခဲ့ရာမှာတော့ ကိုဗစ်လူနာတွေကိုတွေ့ရှိခဲ့တာပါ။

ဒီမိဘမဲ့ဂေဟာကျောင်းဟာ ရောဘတ်စစ်ရှောင်စခန်းမှာရှိနေတာကြောင့် ရောဂါကူးစက်မှာစိုးရိမ်နေရသလို ကာကွယ်မှုတွေ လုပ် ဆောင်ထားတယ်လို့ ဗန်းမော်ခရိုင်ဇုံနယ် နှစ်ခြင်းခရစ်ယာန် လူမှုဖွံဖြိုးရေးဌာန တာဝန်ခံ ဦးထိန်မန်နော်ကပြောပါတယ်။

“ကျွန်တော်တို့စစ်ရှောင်အနေနဲ့တော့ စိုးရိမ်မှုတော့ရှိတာပေါ့။ ဒါပေမဲ့ စစ်ရှောင်တွေလဲအပြင်မထွက်နဲ့ Lockdown ပုံစံချထား တာပေါ့။ အဝင်လမ်းမှာဆေးဖြန်း။ မလိုအပ်လို့ရှိရင်မထွက်အောင် စခန်းကနေပြီးတော့ကြီးကြပ်ထားတာပေါ့။ ရောဘတ်စခန်းမှာ (၃၀၀၀)ကျော်လောက်ရှိတယ်။ အိမ်ထောင်စုက(၆၀၀)လောက်ရှိတယ်။ ”

ရောဘတ်စစ်ရှောင်စခန်းမှာရှိတဲ့စစ်ဘေးရှောင်တွေဟာ ၂၀၁၁ခုနှစ်က မြန်မာစစ်တပ်နဲ့ကချင်လွတ်လပ်ရေးအဖွဲ့KIAတို့ တကျော့ပြန်တိုက်ပွဲတွေမှာ နေရပ်ကနေတိမ်းရှောင်နေကြရတာပါ။ လက်ရှိဗန်းမော် မိုးမောက်မြို့နယ်အတွင်းမှာ တိုက်ပွဲတွေ ဆက်လက်ရှိနေတာကြောင့် စစ်ဘေးရှောင်တွေနေရပ်ပြန်ဖို့ အခက်ခဲရှိနေဆဲအခြေအနေမှာရှိနေပါတယ်။

 

Leave a Reply

Your email address will not be published. Required fields are marked *