ဖယ်ခုံမှာ ကရင်နီပူးပေါင်းအဖွဲ့နဲ့မြန်မာစစ်တပ်တိုက်ပွဲဖြစ်

ဖယ်ခုံမှာ ကရင်နီပူးပေါင်းအဖွဲ့နဲ့မြန်မာစစ်တပ်တိုက်ပွဲဖြစ်

 

ရှမ်းပြည်နယ်တောင်ပိုင်း ဖယ်ခုံမြို့နယ်ဘက်မှာ ကရင်နီကာကွယ်ရေးပူးပေါင်းတပ်ဖွဲ့နဲ့ စစ်ကောင်စီ တပ်အကြား ဒီမနက်မှာ တိုက်ပွဲပြင်းထန်ဖြစ်ပွါးခဲ့သလို ချင်းပြည်နယ် မင်းတပ် မြို့နယ်ဘက်မှာလည်း မနေ့ကတိုက်ပွဲဖြစ်ပွါးခဲ့ပါတယ်။ စစ်ရေးတင်းမာမှု ဖြစ်စဉ်အတွင်းရွာသားတွေ ဖမ်းဆီး ပစ်ခတ်ခံရမှု တွေလည်း ရှိနေပါတယ်။ ဒီသတင်းကို ဗွီအိုအေမြန်မာပိုင်းသတင်းထောက် နိုင်ကွန်းအိန်က တင်ပြပေးထားပါတယ်။

 

ရှမ်းပြည်နယ်တောင်ပိုင်း၊ ဖယ်ခုံမြို့နယ် လွယ်ဟွဲကျေးရွာဘက်မှာ ထိုးစစ်ဆင်လာတဲ့မြန်မာစစ်တပ်နဲ့ ကရင်နီကာကွယ်ရေး ပူးပေါင်းတပ်ဖွဲ့တို့ ဒီနေ့မနက်ပိုင်းမှာ တိုက်ပွဲဖြစ်ပွါးခဲ့တယ်လို့ ကရင်နီအမျိုးသား ကာကွယ်ရေးအဖွဲ့ KNDFတာဝန်ရှိသူတဦးက ပြောပါတယ်။

 

“လက်ရှိတော့ ဖယ်ခုံမှာ PDF (၃) ဖွဲ့ ပေါင်းထားတဲ့အဖွဲ့လေ။ ဒီ (၃) ဖွဲ့နဲ့ အဲဒီမှာရှိတဲ့ KNDF တပ်ရင်းနဲ့ တော့ သူတို့ ပေါင်းပြီးတော့ ခုခံတိုက်ခိုက်နေတာပေါ့လေ။ ရှမ်းပြည်ကနေဆင်းလာတဲ့ စကစ ကို သူတို့ အခုဖြတ်တိုက်နေတယ်။ ဖယ်ခုံတိုက်ပွဲက ကျနော်တို့ဘက်က တယောက်ဒဏ်ရာရတယ်။ စကစ ဘက်က (၅) ဦးနဲ့ အထက်လောက်ကျတယ်။”

 

လက်ရှိတိုက်ပွဲဖြစ်ပွါးရာ ဖယ်ခုံမြို့နယ်ဘက်ကို ကယားပြည်နယ်လွိုင်ကော် ဒီးမော့ဆိုဘက်က မြန်မာ စစ်တပ်ကနေ စစ်ကူပို့လာနေဆဲလို့ သူကပြောပါတယ်။မနေ့ကလည်း ဖယ်ခုံမြို့နယ်အနောက်ဖက်ခြမ်းမှာ မြန်မာစစ်တပ်ကနေ စစ်ကြောင်း (၃) ကြောင်း တပ်ဖြန့်ချီတက်လာတာမှာ ဒေသခံကရင်နီကာကွယ်ရေးအဖွဲ့တွေနဲ့ တိုက်ပွဲဖြစ်ပွါးခဲ့ပါသေးတယ်။

 

တိုက်ပွဲဖြစ်ပွါးရာ ဖယ်ခုံမြို့နယ် လွယ်ဟွဲကျေးရွာဘက်မှာ ရွာသားတွေ ဘေးလွတ်ရာရှောင်တိမ်းနေ ရတယ်လို့ KNDF တာဝန်ရှိသူတဦးကပြောပါတယ်။စစ်ကောင်စီ ပြောခွင့်ရဗိုလ်ချုပ်ဇော်မင်းထွန်းကတော့ ဖယ်ခုံဘက်ဖြစ်ပွါးတဲ့ဒီကနေ့ တိုက်ပွဲ အခြေအနေ မသိသေးဘူးလို့ ပြောပါတယ်။

“ဒီမနက်ဖြစ်တာတွေ ကျနော်တို့လည်း မသိသေးဘူးဗျ။ မနေ့က မိုးဗြဲ၊ ဖယ်ခုံဘက်မှာမရှိပါဘူးဗျ။”မနေ့က သြဂုတ်လ (၁၄) ရက်နေ့မှာ ကယားပြည်နယ် ဒီးမော့ဆိုမြို့နယ် အရှေ့ဘက်ခြမ်းရှိ ရိက္ခာပြန် လာယူတဲ့ အမျိုးသားလေးဦးကို စစ်ကောင်စီတပ်မှ ဖမ်းဆီးခေါ်ဆောင်သွားတယ်လို့ သိရပါတယ်။ ဒီအခြေအနေကို ဒီးမော့ဆိုဒေသခံတဦးက အခုလို ပြောပါတယ်။

 

“မနေ့ကဖမ်းမိထားတဲ့လူ (၄) ယောက်က ဟိုတရက်ည စစ်ဖြစ်တော့ သူတို့ရှောင်တိမ်းနေရတယ် လေ။ နေ့လယ်လောက်မှာ သူတို့မိသားစုအတွက် သူတို့ရိက္ခာပြန်ယူပြီးတော့လမ်းမှာ စစ်ကြောင်းနဲ့ တိုးတော့ သူတို့ကိုဖမ်းသွားတာပေါ့။”
သြဂုတ်လ (၁၃) ရက်နေ့မှာ ကရင်နီတပ်မတော် (KA)၊ ကရင်နီအမျိုးသားကာကွယ်ရေးတပ် (KNDF) ပူးပေါင်းတပ်နဲ့ စစ်ကောင်စီတပ်တို့ ဒီးမော့ဆိုမြို့နယ်မှာ အပြန်အလှန်ပစ်ခတ်ခဲ့လို့ ဒေသခံအများပြား ထွက်ပြေးတိမ်းရှောင်ခဲ့ရပါတယ်။

 

ဒါ့အပြင်စစ်ကောင်စီတပ်နဲ့ စစ်ရေးတင်းမာနေတဲ့ချင်းပြည်နယ်အတွင်းမှာလည်း တိုက်ပွဲတွေနဲ့ ဒေသခံတွေကို ပစ်ခတ်ဖမ်းဆီးမှုတွေ ရှိနေပါတယ်။ချင်းပြည်နယ် မင်းတပ်မြို့နယ်မှာလည်း မနေ့မနက်ပိုင်းမှာ မြန်မာစစ်တပ်နဲ့ မင်းတပ်ကာကွယ်ရေးအဖွဲ့ CDF တို့ တိုက်ပွဲဖြစ်ပွါးခဲ့တယ်လို့ စစ်ကောင်စီ ပြောခွင့်ရ ဗိုလ်ချုပ်ဇော်မင်းထွန်းက ပြောပါတယ်။

 

“မနေ့ကတော့ မင်းတပ်ဘက်မှာတော့ ထိတွေ့မှုတခုဖြစ်တာရှိတယ်။ ကွီရွာဘက်မှာလားမသိ။ အဲဒီမှာတော့ ထိတွေ့မှု တခုရှိတယ်။ မနက် (၁၀) နာရီလောက်မှာဖြစ်ခဲ့တာရှိတယ်။ အကြမ်းဖက်အဖွဲ့နဲ့ ကျနော်တို့နယ်မြေလုံခြုံရေးလုပ်နေတဲ့ အဖွဲ့တွေနဲ့ (၁၅) မိနစ်လောက် ထိတွေ့မှုဖြစ်ခဲ့တာရှိတယ်။ ကျနော်တို့ဆီက စစ်သည်တယောက် ဒဏ်ရာရရှိသွားတာရှိပါတယ်။”

 

ဒီကနေ့မှာတော့ ချင်းပြည်နယ် ကန်ပက်လက်မြို့နယ် ကန့်သာရုံကျေးရွာအတွင်း မြန်မာစစ်တပ်ကနေ ပစ်ခတ်မှုကြောင့် သားအဖနှစ်ဦး ထိခိုက်ဒဏ်ရာရရှိသွားတယ်လို့ ဒေသခံတဦးကပြောပါတယ်။“ဒီမနက် (၁၁) ၀န်းကျင်မှာ ကန့်သာရုံကျေးရွာကို စစ်ကောင်စီအဖွဲ့တွေသွားတယ်။ အသက် (၃၀) အရွယ်ဦးထန်းဟုန်းနဲ့ သူရဲ့ သားလေး မောင်နိုင်းထားတို့ကို သူတို့ကသွားပစ်တယ်။ ဦးထန်းဟုန်း ကတော့ ဆီးခုံရယ်၊ ဒူးရယ်၊ လက်မောင်းရယ် ဒဏ်ရာ ရရှိတယ်။ နောက်ပြီးတော့ အခုမကွေးဆေးရုံကို ကြက်ခြေနီအဖွဲ့တွေကခေါ်သွားပြီ။ သူ့ရဲ့သားငယ် (၄) နှစ်ရှိ မောင်နိုင်းထားကျတော့ လည်ပင်းမှာ ကျည်ဆံရှပ်ထပြီးတော့မှ စိုးရိမ်ရတဲ့အခြေအနေမရှိဘူးခင်ဗျ။”

 

မနေ့ကလည်း အဲဒီ ကန့်သာရုံကျေးရွာက အလယ်တန်းပြကျောင်းဆရာဦးအောင်ဖုန်းနဲ့ လူငယ် နှစ်ယောက်ကို စစ်တပ်က စစ်ကားနဲ့ ဖမ်းဆီးခေါ်ဆောင်သွားတယ်လို့ ဒေသခံတွေကပြောပါတယ်။စစ်ကောင်စီပြောခွင့်ရ ဗိုလ်ချုပ်ဇော်မင်းထွန်းက ဒီဖြစ်စဉ်မရှိခဲ့ဘူးလို့ ပြောပါတယ်။

“ကန်ပက်လက်မှာတော့မရှိပါဘူး။ ”

လက်ရှိရှမ်းပြည်နယ်ဖယ်ခုံ ကယားပြည်နယ်ဒီးမော့ဆို ဖရူဆို၊ လွိုင်ကော်၊ ချင်းပြည်နယ် မင်းတပ်၊ ဟားခါး၊ ကန်ပက်လက်မြို့ နယ်မှာ ဒေသခံကာကွယ်ရေးအဖွဲ့တွေနဲ့ မြန်မာစစ်တပ်တို့အကြား ပစ်ခတ် တိုက်ခိုက်မှုတွေရှိနေသလို ဖမ်းဆီးမှုတွေကလဲ တိုးလာနေဆဲအခြေအနေမှာရှိနေပါတယ်။

 

VOA NEWS

 

 

Leave a Reply

Your email address will not be published. Required fields are marked *